უმსხვილესი ამერიკული სამოგზაურო ინტერნეტ პლატფორმა Earthpix-ი აჭარის ტურისტული პოტენციალით დიანტერესდა. 

მაიამიში დაარსებული, ცნობილი სამოგზაურო ინტერნეტ პლატფორმის დამფუძნებლები აჭარას, ციფრული მარკეტინგის საერთაშორისო კამპანიის ფარგლებში სტუმრობენ. 

ციფრული მედიის სამოგზაურო პლატფორმა Earthpix-ი, 24 მილიონზე მეტი გამომწერით, მსგავსი პლატფორმების ტოპ ხუთეულშია. 

EARTHPIX აუდიტორიას აჭარაში მოგზაურობის დაუვიწყარ შთაბეჭდილებებს, ბუნების, კულტურის, მთისა და ზღვის კონტრასტით მიღებულ ემოციებს უზიარებს. ერსპიქსის ვიდეორგოლებს თვეში 400 მილიონიანი ნახვა აქვს. 

აჭარის ფინანსთა და ეკონომიკის მინისტრი ჯაბა ფუტკარაძე ტურიზმის დეპარტამენტის თავმჯდომარის მოადგილესთან ქრისტინე ძიძიგურთან ერთად ინტერნეტ პლატფორმის დამფუძნებლებს შეხვდა და აჭარის პოპულარიზაციის შესახებ დაგეგმილი მარკეტინგული კამპანიის დეტალებს გაეცნო.

EarthPix-ის პლატფორმაზე ,,ალი და ნინოს“ ვიდეო უკვე განთავსდა, რომელმაც ამ დროისთვის 6 მილიონზე მეტი გამომწერის ყურადღება მიიპყრო. აჭარაში სტუმრობის ფარგლებში EarthPix-ის წარმომადგენლები შექმნიან და პლატფორმაზე განათავსებენ ფოტო და ვიდეო ქონთენთს ბათუმის, აჭარის ტურისტული ატრაქციების, ზღვის აქტივობების, კულტურული მემკვიდრეობის, გასტრონომიული კულტურის შესახებ.