აჭარაში ზაფხულის ტურისტული სეზონისთვის სამზადისი დაიწყო
13 აპრილი, 2023
ბათუმში ზაფხულის
ტურისტული სეზონის სამზადისთან და სეზონის გახსნის ღონისძიებასთან დაკავშირებით
ტურისტული სექტორის წარმომადგენლებთან შეხვედრა გაიმართა. სამუშაო შეხვედრაზე, რომელსაც
აჭარის მთავრობის თავმჯდომარე თორნიკე რიჟვაძე დაესწრო, რეგიონში ტურიზმის კუთხით
მიმდინარე პროექტებზე, განახლებულ ტურისტულ პროდუქტებსა და ტურისტული სეზონის
მოლოდინებზე ისაუბრეს.
შეხვედრაზე აჭარის
ტურიზმის დეპარტამენტის ხელმძღვანელმა თინათინ ზოიძემ სექტორს რეგიონში ტურისტების
მოზიდვის სტრატეგია, მიმდინარე ტურისტული პროექტები და ბათუმში წელს დაგეგმილი საერთაშორისო
ღონისძიებები გააცნო. მათ შორის ისეთი ტურისტული და სპორტული ღონისძიებები,
როგორებიცაა World
Trawel Awards-ის დაჯილდოების ღონისძიება, ევროპის სოფლის
ტურიზმის გენერალური ანსამბლეა, ფეხბურთის 21 წლამდელთა ევროპის ჩემპიონატი,
ჭადრაკის მსოფლიო ჩემპიონატი (18 წლამდელთა), ქალთა შორის ხმლით ფარიკაობაში
მსოფლიო თასის გათამაშება და სხვა. დღესვე, დაანონსდა ზაფხულის ფესტივალის
გამართვის თარიღიც. ბათუმი ერთ-ერთი ყველაზე ფერად და საინტერესო ფესტივალს 3-4
ივნისს უმასპინძლებს და წელს ის ორდღიანი
იქნება.
სამუშაო შეხვედრაზე
ასევე აღინიშნა, რომ ტურიზმის აღდგენის დინამიკა რეგიონში უპრეცედენტოა. ტურიზმიდან
და მოგზაურობიდან მიღებული შემოსავლები 2019 წელთან შედარებით გაორმაგებულია.
საერთაშორისო მოგზაურობიდან მიღებული შემოსავლები საქართველოში 3.5 მლრდ აშშ დოლარს აღემატება. 2022 წელს შიდა
და უცხოელი ვიზიტორების მიერ განხოეციელებული ვიზიტების რაოდენობა აჭარის რეგიონში 3 909 094 ვიზიტს. 2022 წელს სრულად აღდგა
ვიზიტები და ფრენები ბათუმის საერტაშორისო აეროპორტში. ასევე, გაზრდილია სასტუმროების და განთავსების
ოებიექტების დატვირთულობის კოეფიციენტი. 2022 წლის განმავლობაში დატვირთულობა
განთავსების ობიექტებში 2019 წლის მაჩვენებელთან შედარებით გაზრდილია +15.5%-ით,
ბრენდულ სასტუმროებში 22%-ით, ხოლო კერძო ბინებში დატვირთვა 2019 წლის ანალოგიურ მაჩვენებელს 36% -ით აღემატება.
საინტერესო ტურისტული
პროდუქტებით ხვდება ტურისტულ სეზონს აჭარა, სადაც მოგზაურებს ზიპლაინი ბათუმის
ბოტანიკურ ბაღში, კანიონინგი კაპნისთავსა და უჩხოში, სამთო ველობილიკი
ქედა-შუახევში, ტურისტული თავშესაფრები და საპიკნიკე ინფრასტრუქტურა ჯვარიმინდორზე,
ჩირუხში, კაპნისთავსა და შუამთაზე, ასევე
25-მდე მარკირებული ტურისტული მარშრუტი ელოდებათ.
შეხვედრას აჭარის
ფინანსთა და ეკონომიკის მინისტრი ჯაბა ფუტკარაძე, ბათუმის მერი არჩილ ჩიქოვანი და
ტურისტული სექტორის წარმომადგენლები ესწრებოდნენ.
იხილეთ გალერეა