გაეროს ბავშვთა ფონდსა და საექთნო ასოციაცია „ნუმანეს“ შორის დაწყებული თანამშრომლობის ფარგლებში ქ. ბათუმში მიმდინარეობს ტრენერთა ტრენინგი, რომელიც მიზნად ისახავს ექთან ტრენერების მომზადებას ეპიდემიური და პანდემიური ვირუსებისა და მათი საწინააღმდეგო ვაქცინაციის საკითხებში.

ტრენინგს უძღვებიან დაავადებათა კონტროლისა და საზოგადოებრივი ჯანმრთელობის ეროვნული ცენტრის გადამდებ დაავადებათა დეპარტამენტის უფროსი ხათუნა ზახაშვილი და ბოხუას სახელობის კარდიოვასკულური ცენტრისა და „ნიუ ჰოსპიტალის“ ანესთეზია-რეანიმაციის სამსახურების ხელმძღვანელი, ანესთეზიოლოგი ლევან ვაშაკიძე.

პროექტის ფარგლებში, მომზადებული ექთან ტრენერების მიერ ქვეყნის სხვადასხვა რეგიონში ჩატარდება საინფორმაციო შეხვედრები სხვადასხვა კლინიკებში დასაქმებულ ექთნებთან, რათა გაიზარდოს მათი როლი ვაქცინაციის კამპანიის წარმართვის პროცესში.

შეხვედრის მონაწილეებს მიესალმნენ აჭარის ჯანდაცვის მინისტრი ნინო ნიჟარაძე, მინისტრის პირველი მოადგილე მარი ზანაქიძე და გაეროს ბავშვთა ფონდის წარმომადგენელი საქართველოში ღასან ხალილი.